आपण सारे मिळून सांभाळूया या योजनेतर्गत जे गरीब कुटुंबातील मतिमंद (दिव्यांग) मुले यांना सांभाळण्याचा खर्च करू शकत नाहीत त्यासाठी समाजातील दातृत्व भावना असणाऱ्यांनी या योजनेत सामील होऊन दर महिना 100 रु. ते 300 रु. पावतीद्वारे संस्थेकडे जमा करून सहकार्य करावे.

आपल्या पश्चात काय? या प्रश्नाच्या उत्तरासाठी पालकांनी एकत्र येऊन स्थापन केलेल्या आशादीप या संघटनेला 25 वर्षे पूर्ण झाली आहेत. 18  वर्षांपासून 60 वयोगटातील पुरुष व महिला अर्धी तीव्र मतिमंद ते सौम्य मतिमंद या गटातील 25 मुले आज आमच्या संस्थेत आहेत. घराच्या मायेनं संगोपन करणारे 11 कर्मचारी (महिला व पुरुष) समाजातील काही सामाजिक बांधिलकी जपणारे संस्थेचे हितचिंतक यामुळेच हे शक्य झाले आहे.

आता या मुलांचे केवळ संगोपन न करता त्यातील काही कार्यक्षम व्यक्ती कडून कागदी पिशव्या / फुले, मेणबत्ती, ऑफिस फाईल, आकाश कंदील, फळा, डस्टर, केरसुणी, रंगीत पणत्या अशा उत्पादनाने त्यांना स्वयंरोजगार देण्याचीही सुरूवात केलेली आहे. तेही तज्ञ कर्मचारी मंडळींच्या
सहकार्यामुळे आमच्या यशाचे हेच रहस्य आहे.

निसर्गरम्य कोकणातील शेती बागायतीसह पूरक व्यवसायातून त्यांचे पुनर्वसन करण्याचा संस्थेचा उपक्रम येणाऱ्या २ / ३ वर्षात लवकरच कार्यान्वित करण्याचा प्रयत्न करीत आहेत. या मुलांच्या पालकांची गरज लक्षात घेता, अजून २५ मुलांच्या व्यवस्थेसाठी बांधकाम व पूरक साहित्याची गरज आहे. शासकीय धोरणामध्ये वसतिगृहासाठी कोणतीही आर्थिक तरतूद नसल्याने समाजातील दानशूर संस्था व व्यक्ती यांच्या मदतीनेच हे कार्य चालविले आहे. इच्छुक दाते आपली मदत येथे जमा करू शकतात.